From kuya to Eedai

Matagal ko ng hindi nakikita ang dating prinsesa ng bahay, pasensya na hindi ako nakapunta nung kaarawan mo, andami ko na nga utang sa ‘yo. Hayaan mo babawi din ako, one-time big time. Sabi ko nga hindi na ‘ko sasampa ng bente-singko at heto malapit mo na ‘ko abutan, kaya nga fist locks lang at hindi na kita pinagmamano. Ang tito mo heto nagsusubsob pa rin sa trabaho, ngayon ko na lang napagtanto na sana talaga dapat sumali na ako sa “ang TV” nun, asawa ko na sana si Anne Curtis ngayon. Tapos siya na lang nagtratrabaho.

Dati hinahatid lang kita pagpasok sa eskwela, ngayon dalaga ka na. Huwag ka nagsususuot ng pekpek shorts kasi paalis pa lang ang tag-init, kasalanan mo pa sa mga madapuan ng kuliti. At kapag lumuwa kaluluwa mo baka hindi na yan bumalik sabi nga ni kuya Badoodles, magiging zombie ka. Hahabulin ka ng plants, sige ka. Lalo na ng mga talong. Kapag sinisipulan ka pakita mo lang yang gitnang daliri mo, kapag may kumuha ng number mo sabihin mo dalawa gamit mo, tapos bigay mo din number ko. Para makaliskisan muna, at makapagpa-load na din, hehe.

Kung magbo-boyfriend ka siguraduhin mong lalake. Wala namang eksaktong requirements, basta lang yung mabaet, at mapera. Para siya yung nagpapainom at hindi kami. Alam ko walang lalaking makakapag-paiyak sa ‘yo pero kung sakaling sutilin ka ng langit at dumating yung time na yun isumbong mo kaagad sa akin, tatanggalan natin siya ng etits.

Nami-miss ka na daw ni Meh, alam mo naman ang lola mong yun kakapanuod ng telenobela eh masyadong emosyonal. Eh di lalo naman pag naging artista pa ako. Ikaw ang sentro ng atensyon niya nun, at wala kami reklamo dahil nga walang anak na babae si ermats kaya ikaw ang prinsesa ng bahay.

Dati kinukutusan kita kapag masyado ka nang makulit, ngayon magpupulis ka na. Ipangako mo sa ‘kin hindi mo ko huhulihin pagdating ng araw dahil madalas ako nakahubad sa kalsada. Maski may baril ka na nun kutos ka pa rin sa akin. Ang hulihin mo yung tarantadong kalabaw na reflex na ang pag-echas sa tapat ng bahay natin kapag dumadaan. Nakaka-loko ang gago eh, ginawang bowl yung aspalto.

Mag-aral ka pala mag-drive para kapag ganap na pulis ka na itakas mo isa sa mga kotse ng opisina ninyo, road trip tayo. Ayos ba?

“brothers part on the level, and meet on the square.”

hindi ko alam ibig sabihin niyan pero maganda pakinggan.

– Ang Tito’ng kuya mong guwapo.